Bakı Dövlət Universiteti Coğrafiya fakültəsi

Qazaxıstanın Kostanay şəhərində müasir Azərbaycan dövlətinin qurucusu, görkəmli siyasi və dövlət xadimi Heydər Əliyevin anadan olmasının 100 illiyinə və Azərbaycan Mədəniyyət Günlərinə həsr olunmuş silsilə tədbirlər keçirilib.

“Birlik” Etnomədəni Birliyinin təşkilatçılığı ilə baş tutan tədbirlər silsiləsi A.Baytursınov adına Kostanay Regional Universitetində və Çelyabinsk Dövlət Universitetinin Kostanay şəhərindəki filialında elmi-praktik konfransın keçirilməsindən başlayıb. 

“Etniklərarası münasibətlər. Müxtəlif ölkələrdə problemli məsələlərin həlli” mövzusunda təşkil edilən tədbirdə Kostanay vilayətinin icra hakimiyyətinin, Azərbaycanın Qazaxıstandakı səfirliyinin, Diasporla İş üzrə Dövlət Komitəsinin, yerli ictimaiyyətin nümayəndələri, professor-müəllim heyəti və Azərbaycandan gələn qonaqlar iştirak ediblər.  

Tədbir iştirakçılarını A.Baytursınov adına Kostanay Regional Universitetinin rektoru Seyitbek Kuanışbayev salamlayıb. 

Bakı Slavyan Universitetinin Jurnalistika kafedrasının müdiri, professor Şəlalə Həsənova, Bakı Dövlət Universitetinin Coğrafiya fakültəsinin Azərbaycan coğrafiyası və coğrafiyanın tədrisi metodikası kafedrasının müdiri Saleh Hağıyev və Diasporla İş üzrə Dövlət Komitəsinin sektor müdiri Sabit Məmmədov  strateji tərəfdaşlıq və Xəzəryanı dostluq məsələlərində Azərbaycan nümunəsi, Heydər Əliyevin həyat və fəaliyyəti, dahi şəxsiyyətin diasporun yaranması və inkişafında rolu barədə məruzələrlə çıxış ediblər. 

Tədbirlər silsiləsi təntənəli konsert proqramı ilə davam edib. Konsert öncəsi Diasporla İş üzrə Dövlət Komitəsinin və “Birlik” ictimai birliyi adından sədr Rafael Hacıbalayevə və digət diaspor fəallarına təşəkkürnamələr təqdim edilib. 

Sonra Qazaxıstan və Azərbaycan sənətçilərinin ifasında xalq və bəstəkar mahnıları, iki ölkənin milli rəqsləri nümayiş etdirilib.  

Konsert çərçivəsində Heydər Əliyevin həyat və fəaliyyətini əks etdirən forosərgi, ölkəmizin zəngin mədəniyyət nümunələrindən ibarət Azərbaycan guşəsi nümayiş etdirilib.

Tədbirlər slsiləsi Qazaxıstan Respublikasının müstəqilliyinin 25 illiyi adına parkdakı “Dostluq Xiyabanı”nda Heydər Əliyevin 100 illiyi münasibətilə ağacəkmə aksiyasının keçirilməsi və Azərbaycandan gələn nümayəndə heyətinin Dostluq Evində fəaliyyət göstərən Azərbaycan Mədəniyyət Mərkəzinə tanışlıq ziyarəti ilə yekunlaşıb.